ជប៉ុនអំពាវនាវឲ្យរដ្ឋាភិបាលចិន ប្រាប់ពលរដ្ឋខ្លួនឲ្យរក្សាការស្ងៀមស្ងាត់
ហ្វ៊ូគូស្ហ៊ីម៉ា៖បន្ទាប់ពីអាជ្ញាធរជប៉ុន បានចាប់ផ្តើមបង្ហូរទឹកកាកសំណល់ នៅមជ្ឈមណ្ឌលនុយក្លេអ៊ែរហ្វ៊ូគូស្ហ៊ីម៉ា ចូលទៅក្នុងសមុទ្រ សកម្មភាពតវ៉ាបានស្ទុះឡើងកាន់តែខ្លាំង ពីសំណាក់ប្រជាជនចិន។ មន្ត្រីរដ្ឋាភិបាលជប៉ុនបានលើកឡើងថា ប៉ុន្មានថ្ងៃមកនេះ មានករណីជនជាតិចិន ហៅទូរស័ព្ទមករំខាន និងជេរប្រមាថមកលើប្រជាជនជប៉ុន នៅតំបន់ហ្វ៊ូគូស្ហ៊ីម៉ា។
ចាប់តាំងពីថ្ងៃព្រហស្បតិ៍ លេខទូរស័ព្ទចិនបានហៅមកកាន់ សហគ្រាស ភោជនីយដ្ឋាន សាលារៀន និងទីតាំងរដ្ឋបាលនានា នៅតំបន់ហ្វូគូស៊ីម៉ា។ ម្ចាស់ភោជនីយដ្ឋានម្នាក់ បានអះអាងប្រាប់ទីភ្នាក់ងារព័ត៌មាន Kyodo ថា គ្រាន់តែក្នុងមួយថ្ងៃសុក្រ ខ្លួនបានទទួលការហៅទូរស័ព្ទមករំខាន ចំនួនប្រមាណ១០០០ដង ដែលភាគច្រើន សុទ្ធតែជាលេខទូរស័ព្ទហៅមកពីចិន។ ដូចគ្នាដែរ លោកអភិបាលក្រុងហ្វ៊ូគូស្ហ៊ីម៉ា បានសរសេរនៅលើ Facebook ថា សាលាក្រុងលោក បានទទួលការហៅទូរស័ព្ទរំខាន ពីជនជាតិចិន មិនតិចជាង២០០ដងទេ ក្នុងរវាង២ថ្ងៃចុងក្រោយនេះ។ យ៉ាងណាមិញ នៅលើបណ្តាញសង្គមចិន គេឃើញមានជនជាតិចិនជាច្រើននាក់ បានបង្ហោះរូបភាពជាច្រើន បង្ហាញឲ្យឃើញពួកគេចុចលេខទូរស័ព្ទជប៉ុន ដើម្បីតវ៉ា ទាក់ទិននឹងការបង្ហូរទឹកចេញពីរោងចក្រនុយក្លេអ៊ែរហ្វ៊ូគូស្ហ៊ីម៉ា ចូលទៅកាន់សមុទ្រ។
លោក Hiroyuki Namazu មន្ត្រីជប៉ុនទទួលបន្ទុកកិច្ចការអាស៊ី បានបញ្ជាក់ថា រដ្ឋាភិបាលជប៉ុនបានជូនដំណឹងទៅកាន់ស្ថានទូតចិនប្រចាំនៅទីក្រុងតូក្យូ ឲ្យចាត់វិធានការប្រាប់ទៅកាន់ប្រជាជនចិន ឲ្យរក្សាការស្ងាត់ស្ងៀម។ នៅក្នុងលិខិតនោះដែរ ក្រសួងការបរទេសជប៉ុន បានអំពាវនាវ ឲ្យរដ្ឋាភិបាលចិន ត្រូវតែចាត់វិធានការ ដើម្បីធានាការពារសន្តិសុខ សុវត្ថិភាព របស់ប្រជាជនជប៉ុន ព្រមទាំងសហគ្រាសជប៉ុន ដែលស្ថិតនៅក្នុងប្រទេសចិន។
ហ្វ៊ូគូស្ហ៊ីម៉ា ៖ គួរបញ្ជាក់ដែរថា ស្របពេលជាមួយការចេញលិខិតអំពាវនាវនេះ ស្ថានទូតជប៉ុនប្រចាំនៅទីក្រុងប៉េកាំងឯនោះ ក៏បានប្រកាសប្រាប់ទៅកាន់ពលរដ្ឋជប៉ុន ដែលកំពុងស្ថិតនៅក្នុងប្រទេសចិន កុំឲ្យនិយាយគ្នាជាភាសាជប៉ុនឮៗពេក ដើម្បីការពារសុវត្ថិភាពផ្ទាល់ខ្លួន។
សូមបញ្ជាក់ថា ក្រោយការចាប់ផ្តើមបង្ហូរទឹកកាកសំណល់ ចេញពីរោងចក្រនុយក្លេអ៊ែរហ្វ៊ូគូស្ហ៊ីម៉ា ចូលទៅក្នុងសមុទ្រ រដ្ឋាភិបាលចិន បានប្រតិកម្មខ្លាំងៗជាងគេ ដោយបានប្រកាសផ្អាកការនាំចូលគ្រឿងសមុទ្រមកពីជប៉ុន។ ប្រជាជនកូរ៉េខាងត្បូង និងប្រជាជនជប៉ុនមួយចំនួន ក៏បានជួបជុំគ្នាដែរ ដើម្បីធ្វើបាតុកម្មប្រឆាំង ចំពោះប្រតិបត្តិការរបស់ក្រុមហ៊ុន Tepco និងអាជ្ញាធរនុយក្លេអ៊ែរជប៉ុន។
យ៉ាងណាក៏ដោយ អាជ្ញាធរជប៉ុនអះអាងថា ប្រតិបត្តិការបង្ហូរទឹកកាកសំណល់ ចំនួនប្រមាណ ១លាន៣សែនម៉ែត្រគូប ចូលទៅក្នុងសមុទ្រនេះ គឺនឹងធ្វើម្តងបន្តិច ម្តងបន្តិច រហូតដល់ឆ្នាំ២០៥០។ ជាងនេះទៀត ទឹកកាកសំណល់នេះ ត្រូវគេយកទៅបន្សុត បន្សាបជាតិវិទ្យុសកម្ម នៅសល់តែសារធាតុ Tritium មួយមុខបណ្ណោះដែលមិនអាចផ្តាច់ចេញបាន។ ទឹកកាកសំណល់នេះ ត្រូវគេយកទៅលាយជាមួយទឹកសមុទ្រ មុននឹងបង្ហូរទៅឆ្ងាយក្នុងបាតសមុទ្រ ដោយអនុឡោម ទៅតាមការអនុញ្ញាតពីសំណាក់ទីភ្នាក់ងារថាមពលនុយក្លេអ៊ែរអន្តរជាតិ។ នៅថ្ងៃអាទិត្យ ២ថ្ងៃក្រោយការចាប់ផ្តើមប្រតិបត្តិការបង្ហូរ រដ្ឋមន្ត្រីក្រសួងបរិស្ថានជប៉ុនបានអះអាងថា គេបានស្រង់សំណាកជាថ្មី ពីក្នុងទឹកសមុទ្រ ដែលបង្ហាញថាគ្មានសញ្ញាអ្វីបញ្ជាក់អំពីកម្រិតខ្ពស់នៃ សារធាតុ Tritium ហើយក៏គ្មានសញ្ញាសារធាតុវិទ្យុសកម្មអ្វីដែរនៅក្នុងទឹក៕
Post a Comment