អាជ្ញាធរ ភូមាចាប់ខ្លួនអ្នកឆបោកអនឡាញបាន៩៥នាក់
នៅសប្តាហ៍នេះ ប៉ូលិសភូមាចាប់ខ្លួនមនុស្សបាន៩៥នាក់ នៅក្រុងរ៉ង់ហ្គូន ពីបទជាប់សង្ស័យរកស៊ីឆបោកតាមបណ្តាញអ៊ីនធ័រនែត។ នេះបើតាមការជូនដំណឹងរបស់អាជ្ញាធរភូមានៅល្ងាចថ្ងៃសុក្រទី ២៧តុលា២០៣។
ជាសរុបអាជ្ញាធរភូមាចាប់ខ្លួនមនុស្សបាន៩៥នាក់ កាលពីថ្ងៃព្រហស្បតិ៍ទី ២៦តុលា ភាគច្រើនជាជនជាតិភូមា ក្នុងទីតាំងបីកន្លែងផ្សេងគ្នា នៅក្រុងរ៉ង់ហ្គូន។ ក្នុងពេលចុះឆែកឆេរនោះ ប៉ូលិសក៏រឹបអូសបាននូវឡានមួយគ្រឿង កុំព្យូទ័រ ទូរស័ព្ទដៃជាច្រើនគ្រឿង ព្រមទាំងសម្ភារៈជាច្រើនផ្សេងទៀត ប៉ុន្តែជនសង្ស័យជាអ្នកទទួលខុសត្រូវនៃបណ្តាញឆបោកនេះ បានគេចខ្លួនរួច ពេលប៉ូលិសទៅដល់ផ្ទះ។ នេះបើតាមសេចក្តីថ្លែងការណ៍របស់រដ្ឋាភិបាលសឹកភូមាចេញផ្សាយនៅព្រលប់ថ្ងៃសុក្រទី ២៧តុលា។
នេះជាលើកទីមួយហើយដែលអាជ្ញាធរភូមាបានប្រកាសចាប់ខ្លួនមនុស្សបានក្នុងទ្រង់ទ្រាយធំនៅក្រុងរ៉ង់ហ្គូនអតីតរដ្ឋធានីនៃប្រទេស ក្នុងក្របខ័ណ្ឌនៃប្រតិបត្តិការប្រយុទ្ធប្រឆាំងនឹងការរកស៊ីឆបោកតាមអនឡាញ។ ប្រតិបត្តិការចាប់ខ្លួនមុនៗដៅធ្វើតែនៅតាមព្រំដែនភាគខាងជើងជាប់ប្រទេសចិនតែប៉ុណ្ណោះ ព្រោះចិនជាសម្ព័ន្ធមិត្តបានដាក់សម្ពាធលើភូមាឱ្យបិទបញ្ចប់ការឆបោកតាមអ៊ីនធ័រនែតដៅលើពលរដ្ឋចិន។
នៅភូមា បណ្តាញឧក្រិដ្ឋជនជាប់ចោទជាអ្នកចាប់ជំរិតបរទេស ឬទាក់ជនបរទេសឱ្យចូលមកតំបន់គ្មានច្បាប់នៅតាមបណ្តោយព្រំដែនភាគខាងជើងនិងខាងកើតភូមា រួចចាប់បង្ខំឱ្យពួកគេឆបោកតទាក់ជនរួមជាតិ តាមបណ្តាញអ៊ីនធ័រណែត។ បណ្តាញឧក្រិដ្ឋនេះ ទំនងទាក់ទាញ ចាប់ និងបង្ខំមនុស្សរាប់ពាន់នាក់ឱ្យរកស៊ីឆបោកតាមអនឡាញ។
បើតាមភ្នាក់ងារអង្គការសហប្រជាជាតិប្រយុទ្ធប្រឆាំងនឹងគ្រឿងញៀននិងឧក្រិដ្ឋកម្ម ការជួញដូរមនុស្សក្នុងកាស៊ីណូនិងប្រតិបត្តិការឆបោកអនឡាញបានកើនឡើងយ៉ាងខ្លាំងនៅនៅពេញតំបន់អាស៊ីអាគ្នេយ៍ ជាពិសេសនៅតាមបណ្តាប្រទេសតាមបណ្តោយទន្លេមេគង្គ និងបានផលចំណេញយ៉ាងខ្លាំងមិនធ្លាប់មានពីមុនមកទេ។ ផលចំណេញពីរបរឆបោកមានទំហំដល់រាប់ពាន់លានដុល្លារ ស្ទើរស្មើនឹងផលិតផលដុលនៃប្រទេសខ្លះនៅក្នុងតំបន់ផង។
ជនរងគ្រោះបានអះអាងបានធ្វើដំណើរទៅប្រទេសភូមា កម្ពុជា ថៃនិងឡាវ ដោយលង់ជឿនឹងពាក្យសន្យាក្លែងក្លាយ បានការងារធ្វើមានប្រាក់ខែខ្ពស់ ឬ បានជួបគូស្នេហ៍។ តែពេលទៅដល់ត្រូវជាប់ការបង្ឃាំងនិងរងការបង្ខំឱ្យធ្វើការឆបោក ទាក់ជនរួមជាតិឯងបន្តតាមអនឡាញ។
អ្នកនាំពាក្យក្រសួងការបរទេសថៃបានប្រកាសនៅថ្ងៃសុក្រម្សិលមិញថា មានពលរដ្ឋខ្លួនរងគ្រោះជាប់ក្នុងបណ្តាញឆបោកនៅរដ្ឋShanភាគខាងជើងភូមាចំនួន២១៩នាក់ និងសង្គ្រោះបាន១៥៣នាក់៕
Post a Comment