រកឃើញរថយន្តHammerដែលបុកស្លាប់ម្ដាយនិងកូន២នាក់នៅខណ្ឌដូនពេញហើយ
នៅថ្ងៃទី២៧ ខែធ្នូ ឆ្នាំ២០២៣នេះ សមត្ថកិច្ចបានរកឃើញរថយន្តបង្កម៉ាកហាំមឺ(Hammer) ដែលបើកបុកស្លាប់មនុស្ស២នាក់ ដែលជាម្ដាយ-កូន នៅខណ្ឌដូនពេញ រាជធានីភ្នំពេញហើយ ខណៈសមត្ថកិច្ចកំពុងស្រាវជ្រាវទៀត ដើម្បីស្វែងរកចាប់ខ្លួនអ្នកបើកបរមកផ្ដន្ទាទោសតាមផ្លូវច្បាប់។ នេះបើយោងតាមការបង្ហោះនៅលើទំព័រហ្វេសប៊ុកផ្លូវការរបស់ស្នងការដ្ឋាននគរបាលរាជធានីភ្នំពេញ។
ជុំវិញករណីគ្រោះថ្នាក់ចរាចរណ៍នេះ លោក ជួន ណារិន្ទ ស្នងការនគរបាលរាជធានីភ្នំពេញ បានផ្ញើសារអំពាវនាវដល់ជនបង្កដែលបើករថយន្ដបុកជនរងគ្រោះជាម្ដាយ និងកូនបណ្ដាលឱ្យស្លាប់ខាងលើនេះ ឱ្យចូលខ្លួនមកសារភាព និងទទួលស្គាល់កំហុសនៅចំពោះមុខសមត្ថកិច្ច ខណៈសមត្ថកិច្ចរបស់លោកនឹងមិនដកដៃថយឡើយ ក្នុងប្រតិបត្តិការស្រាវជ្រាវស្វែងចាប់ខ្លួនឱ្យខាងតែបាន។
គួររម្លឹកថា នៅយប់រំលងអធ្រាត្រឈានចូលថ្ងៃទី២៥ ខែធ្នូ ឆ្នាំ២០២៣នេះ មានករណីគ្រោះថ្នាក់ចរាចរណ៍មួយកើតឡើងរវាងរថយន្ត និងម៉ូតូ ហើយរថយន្ដបើកគេចខ្លួនបាត់នៅចំណុចទល់មុខផ្ទះលេខ 53E ផ្លូព្រះស៊ីសុវត្ថិ ស្ថិតនៅក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។ ម៉ូតូជនរងគ្រោះ ម៉ាក NEX ពណ៌ស ពាក់ផ្លាកលេខព្រៃវែង1Q-7635 ជិះគ្នា៣នាក់ (ប្ដី ប្រពន្ធ និងកូនអាយុ២ឆ្នាំ) បើកបរទិសដៅពីត្បូងទៅជើង ចំណែកភាគីរថយន្តបង្កមិនស្គាល់ម៉ាក (សង្ស័យរថយន្ដ Hammer) មិនចាំផ្លាកលេខ បើកបរទិសដៅស្របគ្នា បានបុកម៉ូតូពីខាងក្រោយយ៉ាងពេញទំហឹង។ ក្នុងហេតុការណ៍នេះ បណ្ដាលជនរងគ្រោះជាប្រពន្ធឈ្មោះ គ្រួច សាមិត្ត អាយុ២០ឆ្នាំ ស្នាក់នៅភូមិដីថុយ ឃុំដីថុយ ស្រុកបាភ្នំ ខេត្តព្រៃវែង និងកូនអាយុ២ឆ្នាំ ស្លាប់ភ្លាមៗនៅកន្លែងកើតហេតុ ខណៈប្ដីរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត។ ដោយឡែក ចំពោះម្ចាស់រថយន្ដបង្កបានបើកគេចខ្លួនបាត់ស្រមោល៕
Post a Comment