សមត្ថកិច្ចឃាត់ខ្លួនបានជនបង្ករ ៥នាក់ហើយ ពាក់ព័ន្ធករណីចាក់គ្នារឿងរត់ម៉ូតូកង់បីដណ្តើមម៉ូយ
ខេត្តបន្ទាយមានជ័យ ៖ សមត្ថកិច្ចឃាត់ខ្លួនជនសង្ស័យចំនួន៥នាក់នៅថ្ងៃទី០៤ មករា ឆ្នាំ២០២៤ នេះ ក្រោយធ្វើសកម្ម ភាពកាប់ចាក់ទៅលើជនរងគ្រោះចំនួន៥នាក់ដែរបណ្តាលឱ្យមានអ្នករងរបួសព្រោះតែរឿងរត់ម៉ូតូកង់បីដណ្តើមម៉ូយគ្នា ។
លោកវរ់សេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ថា ជនសង្ស័យដែលត្រូវឃាត់ខ្លួន ១-ឈ្មោះ លី ពៅ ភេទប្រុស អាយុ៤៨ឆ្នាំ ២-ឈ្មោះ សោ ភារ៉ា ភេទប្រុស អាយុ៣៣ឆ្នាំ ៣-ឈ្មោះ សោ ភារៈ ភេទប្រុស អាយុ២៩ឆ្នាំ ៤-ឈ្មោះ សោ ភារិទ្ធ ភេទប្រុស អាយុ២៧ឆ្នាំ និង៥-ឈ្មោះ សោ ភារ៉ូន ភេទប្រុស អាយុ២៤ឆ្នាំ រស់នៅ
ភូមិ/សង្កាត់ផ្សារកណ្តាល ក្រុងប៉ោយប៉ោយ។
លោកបានបញ្ជាក់ទៀតថា កាលពីយប់ថ្ងៃទី០១ ខែមករា ឆ្នាំ២០២៤ ស្ថិតនៅចំណុចភូមិក្បាលស្ពានមួយ សង្កាត់អូរជ្រៅ ក្រុងប៉ោយប៉ែត នៅយប់ថ្ងៃឆ្លងចូលឆ្នាំ២០២៤ មានករណីហិង្សា ដោយជនសង្ស័យ១ក្រុមបានជិះរថយន្តឡិចស៊ីសGS-300 ដែលពាក់ផ្លាក់លេខភ្នំពេញ2U-8866 បើកបរដោយឈ្មោះ លី ពៅ បានដឹកជនបង្កនិងមានម៉ូតូកង់៣មកធ្វើសកម្មភាពដេញកាប់ចាក់ទៅលើជនរងគ្រោះ បណ្តាលរបួសធ្ងន់ស្រាល៥នាក់ (២នាក់របួសធ្ងន់) និងជនរងគ្រោះម្នាក់ទៀតកាប់ចំក្បាលត្រូវបានសង្គ្រោះទៅមន្ទីពេទ្យខេត្តបាត់ដំបង។
លោកវរ់សេនីយ៍ត្រី នួន នីណារ៉ូ បានបញ្ជាក់ថា ជម្លោះហិង្សានេះ គឺផ្តើមចេញពីរឿងរត់ម៉ូតូកង់៣ ដណ្តើមម៉ូយគ្នា ហើយកម្លាំងកងរាជអាវុធហត្ថក្រុងប៉ោយប៉ែតបានចុះអន្តរាគមន៍ និងឃាត់ខ្លួនជនបង្កដែលជាជនដៃដល់បានចំនួន៥នាក់ រថយន្ត១គ្រឿង ម៉ូតូកង់៣ចំនួន៤គ្រឿង និងកាំបិត១ ។ ចំណែកបក្សពួកជនបង្កកំពុងរត់គេចខ្លួន៤នាក់ទៀតនោះ ត្រូវសមត្ថកិច្ចតាមស្រាវជ្រាវចាប់ខ្លួនបន្តហើយ ។
Post a Comment