ឆេះសិប្បកម្មផលិតកែវក្រដាសខេស៊ីស្ទើរតែទាំងស្រុង នៅបុរីសែនសុខ
រាជធានីភ្នំពេញ ៖ សិប្បកម្មផលិតកែវក្រដាស ខេស៊ីត្រូវអគ្គិភ័យឆាបឆេះផ្សែងហុយខ្មួលខ្មាញ់ បណ្តាលអោយសម្ភារៈមួយចំនួន និងកែវក្រដាស់ នៅជាន់ទី១ បានរងការខូចខាតស្ទើរតែទាំងស្រុង ។ ហេតុការណ៍អគ្គិភ័យនេះបានកើតឡើងកាលពីវេលាម៉ោង០៩និង៥០នាទីព្រឹកថ្ងៃទី១៥ ខែមេសា ឆ្នាំ២០២៤ នៅចំណុចផ្ទះសិប្បកម្មផលិតកែវក្រដាសខេស៊ី ដែលស្ថិតនៅ ផ្ទះលេខC៩៧ ផ្លូវលេខMaha C បុរីមហាសែនសុន នៅភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
ម្ចាស់សិប្បកម្មដែលត្រូវភ្លើងឆេះឈ្មោះ ឡុង កញ្ចរា ភេទស្រី អាយុ៣២ឆ្នាំ ស្នាក់កន្លែងកើតហេតុខាងលើ ។
តាមសាក្សី បានអោយដឹងថា នៅមុនពេលកើតហេតុគេឃើញ ភ្លើង បានឆាបឆេះ នៅជាន់ទី១ ខ្សែហុយទ្រលោម បង្កអោយមានការភ្ញាក់ផ្អើលដល់ប្រជាពលរដ្ឋនាំគ្នាបាញ់ពន្លត់ តែពុំអាចទប់ស្កាត់បានក៏បានទៅទាក់ទងទៅរថយន្តពន្លត់អគ្គិភ័យទៅអន្តរាគមន៍ ។
តាមនគរបាលបានអោយដឹងថា នៅក្នុងហេតុការណ៍រថយន្តពន្លត់អគ្គិភ័យចំនួន៥គ្រឿងទៅអន្តរាគមន៍បាញ់ពន្លត់ប្រើប្រាស់អស់ទឹកចំនួន ៣រថយន្តហើយភ្លើងបានរលត់ទៅវិញនៅម៉ោង១០និង៣០នាទីថ្ងៃដដែល ។
តាមនគរបាលការិយាល័យ បង្ការពន្លត់អគ្គិភ័យ និងសង្គ្រោះនៃស្នងការនគរបាលរាជធានីភ្នំពេញបានអោយដឹងថា ផ្ទះដែលត្រូវភ្លើងឆេះជាប្រភេទសំណង់ធ្វើថ្មបេតុង ទំហំ០៤ម៉ែត្រ គុណ១៦ម៉ែត្រ បណ្តាលអោយខូចខាតសម្ភារៈនៅជាន់ទី១ រួមមាន ៖ ម៉ាស៊ីនត្រជាក់០១គ្រឿង, កែវក្រដាស និងសម្ភារៈមួយចំនួនទៀត ហើយភ្លើងពុំបានឆេះរាលដាលដល់អ្នកផ្ទះក្បែរខាងឡើយ ។
តាមនគរបាលអោយដឹងទៀតថា អគ្គិភ័យនេះ បណ្តាលមកពីឆ្លងចរន្តអគ្គិសនី ហើយកម្ទេចភ្លើងបានធ្លាក់ទៅលើកកេសកែវក្រដាសក្លាយជាអគ្គិភ័យឆាបឆេះតែម្តង ៕
Post a Comment