តារាចម្រៀងកំពូលទើសលោក ម៉ៃ សុគន្ធ បើកឡានគេចគោលដៅត្រួតពិនិត្យជាតិអាកុល មកបុកម៉ូតូកង់បី២គ្រឿង បណ្ដាលរងរបួសច្រើននាក់
ភ្នំពេញ៖ តារាចម្រៀងកំពូលទើសលោក ម៉ៃ សុគន្ធ បានបេីករថយន្ដ LAND CRUISER ពាក់ស្លាកលេខ ភ្នំពេញ 2BW-6802 បេីកគេចពីគោលដៅត្រួតពិនិត្យជាតិអាកុល រួចបេីករត់រហូតជ្រុលទៅបុករះកង់បីឥណ្ឌាពីរគ្រឿង ហេីយរ៉េចង្កូតបុករបាំងថ្មពុះចែកផ្លូវបន្ថែមទៀត។ ហេតុការណ៍នេះបានកេីតឡេីងកាលពីវេលាម៉ោង១២:២០នាទី រំលងអធ្រាត្រឈានចូល ថ្ងៃទី០៥ ខែកញ្ញា ឆ្នាំ២០២៤ ស្ថិតតាមបណ្ដោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ រាជធានីរាជធានី ។
យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្ត ពណ៌ស១គ្រឿង ម៉ាក LAND CRUISER ពាក់ស្លាកលេខ ភ្នំពេញ 2BW-6802 បើកបរតាមបណ្តោយមហាវិថីសហព័ន្ធរុស្សី ក្នុងទិសដៅពីលិចទៅកើត លុះដល់ចំណុចកើតហេតុ ហួសវត្តទឹកថ្លា ក៏បានរេចង្កូតទៅបុកកង់បីឥណ្ឌាពណ៌ ១គ្រឿង បណ្តាលឲ្យកង់បីឥណ្ឌាជ្រុលទៅបុកផ្ទប់ជាមួយកង់បីឥណ្ឌា១គ្រឿងទៀត បណ្តាលឲ្យមានមនុស្សរងរបួសស្រាល។
អ្នកឃើញហេតុការណ៍ បានបន្តទៀតថា បន្ទាប់ពីបុករួច រថយន្តក៏បានបន្តទៅបុករះរបាំងថ្មពុះចែកទ្រូងផ្លូវខូចខាតអស់ចំនួន ៤កង់ ថែមទៀត ទើបអស់ល្បឿនមិនអាចបន្តដំណើរទៅមុខបាន។ ក្រោយពេលកើតហេតុ ទើបគេដឹងថាអ្នកបើកបរនោះជាបុគ្គលល្បីឈ្មោះក្នុងបណ្តាញសង្គមមានឈ្មោះថា ម៉ៃ សុគន្ធ ត្រូវបានសមត្ថកិច្ចបញ្ជូនទៅស្នងការដ្ឋាននគរបាលរាជធានីភ្នំពេញភ្លាមៗផងដែរ។
ប្រភពពីពលរដ្ឋបានបន្ថែមទៀតថា គេបានឃើញរថយន្តបង្កខាងលើ បានបើកគេចគោលដៅត្រួតពិនិត្យរបស់សមត្ថកិច្ច នៅចំណុចផ្លូវក្បែរបឹងបៃតង សង្ស័យបើកបរក្នុងស្ថានភាពស្រវឹង ទើបមកជួបគ្រោះថ្នាក់បែបនេះ។
ក្រោយពេលកេីតហេតុសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះមកធ្វើការវាស់វែងយករថយន្ត និងកង់បីឥណ្ឌាទៅរក្សាទុករង់ចាំការដោះស្រាយនៅពេលក្រោយ ចំណែកលោក ម៉ៃ សុគន្ធត្រូវសមត្ថកិច្ចឃាត់យកទៅធ្វើការសាកសួរ និងបន្តតាមនីតិវិធីច្បាប់។
Post a Comment