អ្នកតាមដានសង្គមគាំទ្រការណែនាំមន្ត្រីនគរបាលចរាចរណ៍បញ្ឈប់ការពួនស្ទាក់ចាប់ពលរដ្ឋតាមដងផ្លូវ
ភ្នំពេញ៖ នៅក្នុងកិច្ចប្រជុំជាមួយផែនការងារសណ្តាប់ធ្នាប់ចរាចរណ៍ កាលពីថ្ងៃទី០២ ខែកញ្ញា ឆ្នាំ២០២៣ លោក ជួន ណារិន្ទ ស្នងការនគរបាលរាជធានី បានប្រកាសណែនាំដល់មន្ត្រីនគរបាលសណ្តាប់ធ្នាប់ចរាចរណ៍ ដែលអនុវត្តច្បាប់ចរាចរណ៍នៅតាមគោលដៅក្នុងភូមិសាស្ត្ររាជធានីភ្នំពេញ ឱ្យលុបបំបាត់ការពួនស្ទាក់ចាប់ប្រជាពលរដ្ឋអ្នកធ្វើដំណើរតាមដងផ្លូវ និងណែនាំដល់មន្ត្រីនគរបាលចរាចរណ៍ទាំងអស់ត្រូវតែមានកាយវិការ ពាក្យសំដីទន់ភ្លន់ និងមិនត្រូវប្រើអំពើហិង្សាទៅលើប្រជាពលរដ្ឋនោះឡើយ។
ជាការកត់សម្គាល់ កន្លងមកធ្លាប់មានប្រជាពលរដ្ឋជាអ្នកដំណើរជាច្រើនបានរិះគន់ និងរអ៊ូរទាំតាមរយៈបណ្ដាញសង្គមជុំវិញករណីមន្ត្រីនគរបាលសណ្តាប់ធ្នាប់ចរាចរណ៍ ឬប៉ូលិសចរាចរណ៍ ពួនស្ទាក់ចាប់។ ពួកគេព្រួយបារម្ភអំពីសុវត្ថិភាពចរាចរណ៍ និងថា សកម្មភាពពួនស្ទាក់របស់មន្ត្រីនគរបាលចរាចរណ៍មិនមែនជាការចូលរួមរឹតបន្តឹងច្បាប់ ដើម្បីកាត់បន្ថយគ្រោះថ្នាក់ចរាចរណ៍នោះទេ។
គួរឱ្យដឹងថា ក្នុងឆមាសទី១នៃឆ្នាំ២០២៣នេះ គ្រោះថ្នាក់ចរាចរណ៍នៅទូទាំងប្រទេសកម្ពុជា បានកើតឡើងចំនួន ១,៥៤៨លើក បណ្ដាលឱ្យមនុស្សស្លាប់ចំនួន ៧៥៦នាក់ និងរងរបួសចំនួន ២,០៧២នាក់។ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០២២ មានការថយចំនួន ៦១លើក ស្មើ ៤ភាគរយ ហើយគ្រោះថ្នាក់ចរាចរណ៍ភាគច្រើនកើតឡើងនៅពេលយប់ ដោយមានរហូតដល់ទៅ៥៤ភាគរយ ក្នុងនោះ រាជធានីភ្នំពេញជាភូមិសាស្ត្រដែលកើតគ្រោះថ្នាក់ចរាចរណ៍ច្រើនជាងគេ៕
Post a Comment